IVAR AASEN-SELSKAPET - EIN PRESENTASJON
SKIPING
Ivar Aasen-selskapet vart skipa 10. mars 1991. Initiativtakarane
var fyrsteamanuensis (no professor) Jarle Bondevik og professor
Oddvar Nes, Nordisk institutt, Universitetet i Bergen, og
fyrsteamanuensis Terje Aarset, Høgskulen i Volda. Samarbeidet
mellom desse tre er ein lekk i Noregsnettet.
FØREMÅL
Føremålet med selskapet er å gje ut etterlatne manuskript av Ivar
Aasen og faglege avhandlingar om Aasen og verket hans.
SKRIFTSERIAR
Publikasjonane vil kome i to skriftseriar: Skrifter frå Ivar
Aasen-selskapet. Serie A. Tekster, og Serie B. Kommentarar og
studiar.
Skrift nr. 1 i serie A, Sunnmørsgrammatikkane av Ivar Aasen,
kom ut i 1992 og er på XXIII + 175 sider. Det inneheld tre utkast
til sunnmørsgrammatikken som Aasen skreiv medan han budde på
Sunnmøre (1838-41), saman med den utgåva han gav ut på Ekset i
1851.
Skrift nr. 2 i serie A, Målsamlingar frå Sunnmøre av Ivar
Aasen, kom ut i april i år. Det inneheld seks manuskript frå tida
1839/40 til 1844 og er på XLIV + 329 sider. Hovudmanuskriptet er
"Materialier til Almuesproget i den nordligste Deel af Bergens
Stift", eit førearbeid til ei ordbok over sunnmørsmålet (om lag
9000 ord) som Aasen utarbeidde i Sogndal hausten 1842.
Skrift nr. 3, Målsamlingar frå Bergens Stift av Ivar Aasen,
ligg føre i manuskript og er klar til prenting (jf. den vedlagde
innhaldslista). Dette bandet vil innehalde grammatiske og
leksikalske arbeid om vestlandsmåla, m.a. landsdelsgrammatikken
"Oplysninger om Almuesproget i Bergens Stift", eit manuskript på
91 sider.
Når det gjeld den vidare framdrifta av arbeidet, syner vi
til den oppsette lista nedanfor.
Fire av bøkene i skriftserien (A) er allereie i arbeid:
Målsamlingar frå Rogaland, Agder og Telemark av Ivar Aasen
(skrift nr. 4), Det norske Folkesprogs Grammatik (1848, skrift
nr. 7, som er halvvegs innskriven), namnesamlingane (skrift nr.
16, som m.a. skal innehalde ei nyutgåve av Norsk Navnebog, 1878,
er ferdig innskriven; dette er eit samarbeidsprosjekt mellom
Terje Aarset og Kristoffer Kruken ved Universitetet i Oslo) og
Dansk-norsk Ordbog (1883, innskriven av Magne Myhren,
Universitetet i Oslo).
AASEN-ARKIV
Ved MRDH Volda (no Høgskulen i Volda) og Nordisk institutt,
Universitetet i Bergen, har det dei tre siste åra vore under
oppbygging eit Aasen-arkiv i samarbeid med Handskriftsamlinga ved
Universitetsbiblioteket i Oslo.
Til no er om lag 150 manuskript på vel 4000 sider kopierte
og lagde til rette for avskriving. Av desse er 35 manuskript på
kring 1000 sider innskrivne på data. Då er ikkje grammatikken frå
1848, namneboka frå 1878 og Dansk-norsk Ordbog medrekna.
I tillegg har det ved norskseksjonen vore under oppbygging
eit omfattande arkiv over sekundærlitteratur om Aasen og arbeidet
hans.
MÅLSAMLINGAR FRÅ BERGENS STIFT AV IVAR AASEN
Redigert av Jarle Bondevik, Oddvar Nes og Terje Aarset
INNHALD
Innleiing. Av Jarle Bondevik
1. Grammatiske og leksikalske arbeid om måla i Bergens Stift
2. Utgjevingsprinsipp
3. Register
4. Symbolbruk
5. Litteraturliste
1. Iagttagelse af Dialekterne [i Romsdal, på Sunnmøre, i
Nordfjord, Sunnfjord og Sogn]
2. Oplysninger om Almuesproget i de nordligste Dele af Bergens
Stift, nemlig Søndmør, Nordfjord, Søndfjord og en Deel af
Yttre-Sogn (Juli 1843)
3. Oplysninger om det sognske Almuesprog
4. Oplysninger om det nordhordlehnske Almuesprog (September 1843
og Februar 1844)
5. Oplysninger om det vossiske Almuesprog (April 1844)
6. Oplysninger om Almuesproget i den sydligste Deel af Bergens
Stift, indbefattende særskilt 1. Hardanger 2. Søndhordlehn.
7. Oplysninger om Almuesproget i Bergens Stift. Juli 1844
8. Ordbog over Almuesproget i Bergens Stift. Begyndelse (Skreven
i Oktober 1844)
SKRIFTER FRÅ IVAR AASEN-SELSKAPET. SERIE A. TEKSTER
FØREBELS UTGJEVINGSPLAN (1994)
I. Sunnmørsgrammatikkane av Ivar Aasen. 1992
II. Målsamlingar frå Sunnmøre av Ivar Aasen. 1994.
III. Målsamlingar frå Bergens Stift av Ivar Aasen. (1994/95)
IV. Målsamlingar frå Rogaland, Agder og Telemark. (1995)
V. Målsamlingar frå Buskerud, Akershus, Oppland og Hedmark. (1996)
VI. Målsamlingar frå Nordmøre, Trøndelag og Helgeland. (1997)
VII. Den norske Folkesprogs Grammatik. (1998)
VIII. Ordbog over det norske Folkesprog. (1999)
IX. Målsamlingar 1850-55. (2000)
X. Målsamlingar 1856-60. (2001)
XI. Målsamlingar 1861-65. (2002)
XII. Målsamlingar 1866-70. (2003)
XIII. Målsamlingar 1871-75. (2004)
XIV. Målsamlingar 1876-96. (2005)
XV. Ymse samlingar frå ymse tider. (2006)
XVI. Namnesamlingar. (2007)
XVII. Samlingar frå andre 1843-50. (2008)
XVIII. Samlingar frå andre 1851-60. (2009)
XIX. Samlingar frå andre 1861-70. (2010)
XX. Samlingar frå andre 1871-96. (2011)
XXI. Dansk-norsk Ordbog. (2012)
XXII. Register. (2012)
Om det blir stilt ressursar til rådvelde, kan arbeidet gå monaleg
snøggare, t.d. slik at det kjem ut to band i året.